ਇੱਕ ਜਨਮ ਵਿੱਚ ਕਈ ਜਨਮਾਂ ਦੀ ਜਿੰਦਗੀ ਜਿਉਂਦੇ ਲੋਕ

ਇਨਸਾਨ ਨੂੰ ਲੰਬਾ ਸਮਾਂ ਜਿਉਣ ਦੀ ਇੱਛਾ ਹਮੇਸ਼ਾਂ ਰਹਿੰਦੀ ਹੈ ਜਾਂ ਵਾਰ ਵਾਰ ਜਨਮ ਲੈਣ ਦੀ ਇੱਛਾ ਰਹਿੰਦੀ ਹੈ l ਉਹ ਆਪਣੀ ਇਸ ਇੱਛਾ ਦੀ ਪੂਰਤੀ ਲਈ ਸਾਰੀ ਉਮਰ ਤਰਲੇ ਕਰਦਾ ਰਹਿੰਦਾ ਹੈ l ਵੱਖ ਵੱਖ ਧਰਮਾਂ, ਸਾਧਾਂ, ਸੰਤਾਂ ਅਤੇ ਚੇਲਿਆਂ ਦਾ ਸਹਾਰਾ ਲੈਂਦਾ ਹੈ ਪਰ ਪੱਲੇ ਫਿਰ ਵੀ ਕੁੱਝ ਨਹੀਂ ਪੈਂਦਾ l ਇਸ ਦੇ ਉਲਟ ਉਹ ਆਪਣੀ ਮਾਨਸਿਕ, ਸਰੀਰਕ ਅਤੇ ਆਰਥਿਕ ਲੁੱਟ ਪੁਜਾਰੀ ਵਰਗ ਤੋਂ ਕਰਵਾਉਂਦਾ ਹੈ ਜਿਸ ਕਾਰਣ ਉਹ ਆਪਣਾ ਇੱਕੋ ਇੱਕ ਮਿਲਿਆ ਵੱਡਮੁੱਲਾ ਜੀਵਨ ਵੀ ਬਰਬਾਦ ਕਰ ਲੈਂਦਾ ਹੈ l ਪੁਜਾਰੀ ਵਰਗ ਇਸ ਤਰਾਂ ਦੇ ਵਿਅਕਤੀ ਨੂੰ ਰੁੱਖੀ ਮਿੱਸੀ ਖਾਣ ਵਾਸਤੇ ਕਹਿੰਦਾ ਹੈ ਅਤੇ ਆਪ ਸਾਰੀ ਉਮਰ ਉਸ ਦੇ ਸਿਰ ਤੇ ਚੋਪੜੀਆਂ ਹੀ ਖਾਂਦਾ ਹੈ l ਪੁਜਾਰੀ ਵਰਗ ਉਸ ਨੂੰ ਕਹਿੰਦਾ ਹੈ ਕਿ ਰੱਬ ਗਰੀਬੀਦਾਵੇ ਮਿਲਦਾ ਹੈ ਪਰ ਆਪ ਮਹਿੰਗੀਆਂ ਕਾਰਾਂ ਵਿੱਚ ਫਿਰਦਾ ਹੈ l ਬਹੁਤੇ ਲੋਕ ਪੁਜਾਰੀਆਂ ਨੂੰ ਇਹ ਨਹੀਂ ਪੁੱਛਦੇ ਕਿ ਜੇ ਰੱਬ ਗਰੀਬੀਦਾਵੇ ਮਿਲਦਾ ਹੈ ਤਾਂ ਤੈਨੂੰ ਮਹਿੰਗੀਆਂ ਕਾਰਾਂ ਵਿੱਚ ਕਿਵੇਂ ਮਿਲਿਆ? ਭਾਵ ਕਿ ਮਨੁੱਖ ਨੂੰ ਆਪਣਾ ਅਗਲਾ ਜਨਮ ਸਵਾਰਨ ਦੇ ਨਾਮ ਤੇ ਸਾਰੀ ਉਮਰ ਲੁੱਟਿਆ ਜਾਂਦਾ ਹੈ l ਮਨੁੱਖ ਹੱਥ ਜੋੜ ਕੇ ਅਤੇ ਸਿਰ ਝੁਕਾ ਕੇ ਸਾਰੀ ਉਮਰ ਆਪਣੇ ਉੱਤੇ ਹੁੰਦੇ ਜ਼ੁਲਮ ਨੂੰ ਬਰਦਾਸ਼ਤ ਕਰਦਾ ਹੈ ਅਤੇ ਬਹੁਤੀਆਂ ਹਾਲਤਾਂ ਵਿੱਚ ਇਹ ਜ਼ੁਲਮ ਉਸ ਦੇ ਸਾਰੇ ਪਰਿਵਾਰ ਤੇ ਹੁੰਦਾ ਹੈ ਕਿਉਂਕਿ ਪਰਿਵਾਰ ਦੀ ਆਰਥਿਕ ਹਾਲਤ ਵੀ ਇੱਕ ਦੂਜੇ ਦੇ ਫੈਸਲਿਆਂ ਨਾਲ ਜੁੜੀ ਹੁੰਦੀ ਹੈ l