ਨਿਊਜ਼ੀਲੈਂਡ ਦੇ ਨਾਮ ਤੇ ਪੰਜਾਬ ਦੇ ਟ੍ਰੈਵਲ ਏਜੇਂਟਾਂ ਵਲੋਂ ਪੰਜਾਬੀਆਂ ਨਾਲ ਠਗੀ ਦੀ ਕੋਸ਼ਿਸ਼

ਇਸ ਸਾਰੇ ਸਿਸਟਮ ਤੋਂ ਤੰਗ ਹੋ ਕੇ ਨੌਜਵਾਨ ਵਿਦੇਸ਼ਾਂ ਵਿੱਚ ਜਾਣ ਲਈ ਮਜ਼ਬੂਰ ਹਨ l ਬਹੁਤਿਆਂ ਨੂੰ ਵਿਦੇਸ਼ਾਂ ਬਾਰੇ ਬਹੁਤੀ ਜਾਣਕਾਰੀ ਨਹੀਂ ਹੁੰਦੀ l ਉਥੇ ਦੇ ਕਾਇਦੇ ਕਨੂੰਨ ਤੋਂ ਵੀ ਅਣਜਾਣ ਹੁੰਦੇ ਹਨ ਪਰ ਫਿਰ ਵੀ ਆਪਣੇ ਬੇਹਤਰ ਭਵਿੱਖ ਲਈ ਵਿਦੇਸ਼ਾਂ ਵਿੱਚ ਜਾਣਾ ਲੋਚਦੇ ਹਨ l ਇਸ ਵਾਸਤੇ ਉਹ ਵਿਦੇਸ਼ ਵਿੱਚ ਹੋਣ ਵਾਲੀਆਂ ਤੰਗੀਆਂ ਦਾ ਵੀ ਮੁਕਾਬਲਾ ਕਰਨ ਲਈ ਤਿਆਰ ਹੋ ਜਾਂਦੇ ਹਨ l ਨੌਜਵਾਨ ਇਹ ਵੀ ਸੋਚਦਾ ਹੈ ਕਿ ਜੇਕਰ ਵਿਦੇਸ਼ ਵਿੱਚ ਤੰਗੀਆਂ ਵੀ ਹੋਣਗੀਆਂ ਤਾਂ ਉਹ ਪੰਜਾਬ ਨਾਲੋਂ ਤਾਂ ਘੱਟ ਹੀ ਹੋਣਗੀਆਂ l

ਇਸ ਮੌਕੇ ਦਾ ਫਾਇਦਾ ਟ੍ਰੈਵਲ ਏਜੇਂਟ ਉਠਾਉਂਦੇ ਹਨ l ਕੁੱਝ ਏਜੇਂਟ ਤਾਂ ਲੱਖਾਂ ਦੀ ਠਗੀ ਮਾਰ ਜਾਂਦੇ ਹਨ l ਬਹੁਤੇ ਪੰਜਾਬੀ ਆਪਣੀਆਂ ਜ਼ਮੀਨਾਂ ਗਹਿਣੇ ਰੱਖ ਕੇ ਜਾਂ ਜ਼ਮੀਨਾਂ ਵੇਚ ਕੇ ਵੀ ਏਜੇਂਟਾਂ ਨੂੰ ਪੈਸਾ ਦੇ ਦਿੰਦੇ ਹਨ l ਕਈ ਪੰਜਾਬੀ ਬਹੁਤ ਜਿਆਦਾ ਵਿਆਜ਼ ਤੇ ਪੈਸਾ ਚੁੱਕ ਕੇ ਵੀ ਟ੍ਰੈਵਲ ਏਜੇਂਟ ਨੂੰ ਦੇ ਦਿੰਦੇ ਹਨ ਜਿਸ ਨੂੰ ਮੋੜਨਾ ਬਹੁਤ ਮੁਸ਼ਕਲ ਹੋ ਜਾਂਦਾ ਹੈ l

ਪਿਛਲੇ ਕੁੱਝ ਹਫਤਿਆਂ ਤੋਂ ਨਿਊਜ਼ੀਲੈਂਡ ਦੇ ਨਾਮ ਤੇ ਪੰਜਾਬ ਦੇ ਏਜੇਂਟਾਂ ਵਲੋਂ ਠਗੀ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ l ਇਸ ਆਰਟੀਕਲ ਦੇ ਥੱਲੇ ਇੱਕ ਚਿੱਠੀ (letter) ਦੀ ਕਾਪੀ ਹੈ ਜਿਸ ਤੋਂ ਲਗਦਾ ਹੈ ਕਿ ਇਹ ਚਿੱਠੀ ਚਾਰਟਵੈੱਲ ਸ਼ੌਪਿੰਗ ਸੈਂਟਰ ਹੈਮਿਲਟਨ, ਨਿਊਜ਼ੀਲੈਂਡ ਦੀ ਲਿਖੀ ਹੋਈ ਹੈ l ਇਹ ਕਾਪੀਆਂ ਪੰਜਾਬ ਵਿੱਚ ਨੌਜਵਾਨਾਂ ਨੂੰ ਨਿਊਜ਼ੀਲੈਂਡ ਵਿੱਚ ਲਿਜਾਣ ਦੇ ਵਾਅਦੇ ਨਾਲ ਵੰਡੀਆਂ ਜਾ ਰਹੀਆਂ ਹਨ l ਪੰਜਾਬ ਤੋਂ ਇੱਕ ਵਿਅਕਤੀ ਨੇ ਇਹ ਚਿੱਠੀ ਦੀ ਕਾਪੀ ਮੇਰੇ ਦੋਸਤ ਨੂੰ ਨਿਊਜ਼ੀਲੈਂਡ ਵਿੱਚ ਭੇਜੀ ਤਾਂ ਕਿ ਇਸ ਦੇ ਸੱਚ ਹੋਣ ਬਾਰੇ ਪਤਾ ਲਗਾਇਆ ਜਾ ਸਕੇ l ਉਸ ਨੇ ਇਹ ਚਿੱਠੀ ਮੇਰੀ ਰਾਏ ਲੈਣ ਲਈ ਮੈਨੂੰ ਭੇਜੀ l ਜਦੋਂ ਮੈਂ ਚਿੱਠੀ ਪੜ੍ਹੀ ਤਾਂ ਮੈਨੂੰ ਚਿੱਠੀ ਨਕਲੀ ਲੱਗੀ l ਕੁੱਝ ਸ਼ਬਦ ਹੇਠ ਲਿਖੇ ਹਨ ਜੋ ਚਿੱਠੀ ਦੇ ਨਕਲੀ ਹੋਣ ਦਾ ਸਬੂਤ ਦਿੰਦੇ ਹਨ :-

*ਚਿੱਠੀ ਲਿਖਣ ਦਾ ਸਟੈਂਡਰਡ ਨਿਊਜ਼ੀਲੈਂਡ ਦੇ ਸਟੈਂਡਰਡ ਨਾਲੋਂ ਬਹੁਤ ਥੱਲੇ ਹੈ l

*ਚਿੱਠੀ ਜਿਸ ਨੂੰ ਲਿਖੀ ਗਈ ਉਸ ਕੰਪਨੀ ਜਾਂ ਵਿਅਕਤੀ ਦਾ ਨਾਮ ਹੀ ਨਹੀਂ ਹੈ l

*ਚਿੱਠੀ ਵਿੱਚ ਸਰ/ਮੈਡਮ (Sir/Madam) ਲਿਖਿਆ ਗਿਆ l ਭਾਵ ਕਿ ਚਿੱਠੀ ਲਿਖਣ ਵਾਲੇ ਨੂੰ ਇਹ ਵੀ ਨਹੀਂ ਪਤਾ ਕਿ ਜਿਸ ਨੂੰ ਚਿੱਠੀ ਲਿਖੀ ਜਾ ਰਹੀ ਹੈ ਉਹ ਸਰ ਹੈ ਜਾਂ ਮੈਡਮ ?

*ਚਿੱਠੀ ਦੇ ਸ਼ੁਰੂ ਵਿੱਚ ਬੰਦੇ ਕਾਮੇ (male workers) ਲਿਖਿਆ ਹੋਇਆ ਹੈ l ਨਿਊਜ਼ੀਲੈਂਡ ਵਿੱਚ ਕਿਸੇ ਕੰਮ ਵਾਸਤੇ ਬੰਦਾ ਜਾਂ ਔਰਤ (male or female) ਨਹੀਂ ਲਿਖਿਆ ਜਾ ਸਕਦਾ ਕਿਉਂਕਿ ਇਥੇ ਆਦਮੀ ਅਤੇ ਔਰਤ ਦੀ ਬਰਾਬਰਤਾ ਹੈ l

*ਤਨਖਾਹ ਅਮਰੀਕੀ ਡਾਲਰਾਂ ਵਿੱਚ ਲਿਖੀ ਹੋਈ ਹੈ ਜਦਕਿ ਨਿਊਜ਼ੀਲੈਂਡ ਵਿੱਚ ਨਿਊਜ਼ੀਲੈਂਡ ਡਾਲਰਾਂ ਦੀ ਕਰੰਸੀ ਹੈ l

*ਤਨਖਾਹ ਤੋਂ ਥੱਲੇ ਨੰਬਰ ਇੱਕ ਵਿੱਚ ਕੰਮ ਦਾ ਸਮਾਂ ਸੋਮਵਾਰ ਤੋਂ ਸ਼ਨੀਵਾਰ ਤੱਕ ਦਾ ਲਿਖਿਆ ਹੈ ਜਦ ਕਿ ਚਿੱਠੀ ਦੇ ਥੱਲੇ ਤਨਖਾਹ ਐਤਵਾਰ ਦੀ ਵੀ ਦਿੱਤੀ ਹੋਈ ਹੈ l

*ਨੰਬਰ ਦੋ ਦੇ ਥੱਲੇ ਹਫਤੇ ਦਾ 48 ਘੰਟੇ ਕੰਮ ਲਿਖਿਆ ਹੋਇਆ ਹੈ ਜਦਕਿ ਨਿਊਜ਼ੀਲੈਂਡ ਵਿੱਚ ਹਫਤੇ ਦੇ 40 ਘੰਟੇ ਹੀ ਫੁੱਲ ਟਾਈਮ ਕੰਮ ਹੁੰਦਾ ਹੈ l

*ਨੰਬਰ 3 ਵਿੱਚ ਓਵਰ ਟਾਈਮ ਦੀ ਤਨਖਾਹ ਲੇਬਰ ਲਾ ਮੁਤਾਬਕ ਲਿਖੀ ਹੈ l ਪਰ ਥੱਲੇ ਜਾ ਕੇ ਤਨਖਾਹ ਦਾ ਵੇਰਵਾ ਵੀ ਲਿਖਿਆ ਹੈ l

*ਇਸ ਚਿੱਠੀ ਤੇ ਈ-ਮੇਲ ਅਤੇ ਫੋਨ ਨੰਬਰ ਵੀ ਨਹੀਂ ਲਿਖਿਆ ਹੋਇਆ l

*ਚਿੱਠੀ ਉਤੇ ਕੋਈ ਰੈਫਰੈਂਸ ਨੰਬਰ ਵੀ ਨਹੀਂ ਹੈ l

*ਚਿੱਠੀ ਵਿੱਚ ਚਿੱਠੀ ਲਿਖਣ ਵਾਲੇ ਦਾ ਨਾਮ ਵੀ ਨਹੀਂ ਲਿਖਿਆ ਗਿਆ l

ਪੜ੍ਹਨ ਤੋਂ ਬਾਦ ਇਹ ਚਿੱਠੀ ਮੈਨੂੰ ਨਕਲੀ ਲੱਗੀ ਪਰ ਫਿਰ ਵੀ ਮੈਂ ਸਬੂਤ ਚਾਹੁੰਦਾ ਸੀ ਤਾਂ ਕਿ ਚਿੱਠੀ ਦੇ ਅਸਲੀ ਜਾਂ ਨਕਲੀ ਹੋਣ ਦਾ ਪਤਾ ਲੱਗ ਸਕੇ l ਮੈਂ ਐਤਵਾਰ ਨੂੰ ਚਾਰਟਵੈੱਲ ਸ਼ੌਪਿੰਗ ਸੈਂਟਰ ਨੂੰ ਈ-ਮੇਲ ਕੀਤੀ ਜਿਸ ਵਿੱਚ ਮੈਂ ਇਸ ਚਿੱਠੀ ਦੀ ਕਾਪੀ ਭੇਜੀ ਅਤੇ ਆਪਣਾ ਫੋਨ ਨੰਬਰ ਵੀ ਭੇਜਿਆ l ਈ-ਮੇਲ ਵਿੱਚ ਮੈਂ ਲਿਖਿਆ ਕਿ ਮੇਰੇ ਨਾਲ ਛੇਤੀਂ ਸੰਪਰਕ ਕੀਤਾ ਜਾਵੇ l ਅੱਜ ਮੈਨੂੰ ਸ਼ੌਪਿੰਗ ਸੈਂਟਰ ਤੋਂ ਫੋਨ ਆਇਆ ਅਤੇ ਉਨ੍ਹਾਂ ਦੱਸਿਆ ਕਿ ਇਹ ਚਿੱਠੀ ਨਕਲੀ ਹੈ l

ਜੇਕਰ ਪੰਜਾਬ ਵਿੱਚ ਇਹ ਚਿੱਠੀ ਕਿਸੇ ਨੂੰ ਮਿਲੇ ਤਾਂ ਇਸ ਨੂੰ ਨਕਲੀ ਸਮਝਿਆ ਜਾਵੇ ਅਤੇ ਇਸ ਧੋਖੇ ਬਾਰੇ ਸਬੰਧਤ ਮਹਿਕਮੇ ਨੂੰ ਜਾਣਕਾਰੀ ਦਿੱਤੀ ਜਾਵੇ l

ਇਸ ਆਰਟੀਕਲ ਨੂੰ ਹੋਰਾਂ ਨਾਲ ਸ਼ੇਅਰ ਕਰ ਦਿੱਤਾ ਜਾਵੇ ਤਾਂ ਕਿ ਬਾਕੀਆਂ ਨੂੰ ਧੋਖੇ ਤੋਂ ਬਚਾਇਆ ਜਾ ਸਕੇ l ਜਿਥੇ ਸਾਡੇ ਵਾਸਤੇ ਆਪ ਧੋਖੇ ਤੋਂ ਬਚਣਾ ਜ਼ਰੂਰੀ ਹੁੰਦਾ ਹੈ ਉਥੇ ਹੀ ਦੂਜਿਆਂ ਨੂੰ ਧੋਖੇ ਤੋਂ ਬਚਾਉਣਾ ਵੀ ਸਾਡੀ ਜਿੰਮੇਂਵਾਰੀ ਹੈ l

-ਅਵਤਾਰ ਤਰਕਸ਼ੀਲ ਨਿਊਜ਼ੀਲੈਂਡ

ਜੱਦੀ ਪਿੰਡ ਖੁਰਦਪੁਰ (ਜਲੰਧਰ)

006421392147